Marcos 14:17-42
Ña tutayamucujpimi, chunga ishqui yachacujcunandij shamurcacuna. Ña meźapi micushpa tiyacushpami, Jesusca:
—Ñucahuan micucuj, cancunapurallataj shujmi Ñucata japichinga, chaica chashnatajmi— nircami.
Chashna nijpica llaquirinacushpami, caishuj chaishuj:
—¿Ñucachu cani?— nijpica, caishujpish —¿Ñucachu cani?— nishpa huashan tapurcacuna.
Chaimantami Jesusca, cashna nirca:
—Chunga ishquipuramanta shujca, Ñucahuan cai platollapitajmi tandata llutacun. Paimi Ñucata japichinga. Runa Aichayujca, Paimanta Quillcashcapi nishca shinallatajmi tucunga. Ashtahuanpish Runa Aichayujta japichij runaca, ¡ai, imachari tucunga! Chai runaca mana huacharishca cashpachari, alli canman carca— nircami.
Micucushpami Jesusca tandata japishpa, Diosta pagui nishpaca, chaupishpa cushpaca:
—Japichij, caica Ñuca aichami— nirca.
Shinallataj ubyanatapish japishpa, Diosta pagui nishpa cujpica, chaitapish tucuicunami ubyarcacuna. Chaita ubyacujpimi cashna nirca:
—Caica, achcacunata quishpichingapaj, ari ninacushca mushuj ruranamanta jichana Ñuca yahuarta ricuchijmi. Dios mandacujpi ubyana punllacama uvas vinotaca, cutinca mana ubyashachu. Chaica chashnatajmi— nircami.
Salmocunata cantashca qʼuipami, Olivos urcuman llujshircacuna.
Jesusca Pedro Paita ‘Mana rijsinichu’ ninatami huillashca
(Mat 26:30-35; Luc 22:31-34; Juan 13:36-38)
Chaipimi Jesusca, cashna nirca:
—Cunan tutaca, tucuicunami Ñucataca shitahuanguichij. Dios Quillcachishcapica: “Michijtaca chugrichishami, ovejacunaca caita chaitami ringacuna” nicunmi. Ashtahuanpish causarishca qʼuipaca, cancunapaj ñaupami Galileaman risha— nircami.
Chashna nijpimi, Pedroca:
—Tucuicuna pʼiñarishpa saquijpipish, ñucatajca manataj saquishachu— nircami.
Shina nijpi, Jesusca:
—Cancarin cunan tutallatajmi, gallo ishqui cutin cantanapajca, quimsa cutin Ñucataca, “Mana rijsinichu” ningui— nircami.
Ashtahuan sinchiyarishpami, Pedroca:
—Quiquinhuan huañuna cashpapish, ñucatajca manataj chashna nishachu— nirca.
Pai chashna nijpica, caishujcunapish, tucuicunami chashnallataj nircacuna.
Getsemaní huertapimi Jesús Diosta mañashca
(Mat 26:36-46; Luc 22:39-46)
Chai qʼuipami, Getsemaní huertaman chayamurcacuna. Chaipimi Jesusca, Paipaj yachacujcunataca: «Diosta Ñuca mañangacama, caillapi tiyacuichij» nircami.
Shina nishpa Pedrota, Jacobota, Juantapish pushashpaca, achcata llaquirishpami chujchui callarirca. Chaimantami paicunataca: «Ñuca almaca llaquihuan huañucunmari. Caillapi chaparashpa shuyacuichij» nircami.
Jesusca chaimanta ashallata rishpaca, pambacama cumurishpami, ‘Ñuca apana cai llaquitaca, ima shinamanta anchuchinguimanpishchari’ nishpa, Diosta cashna mañarca: «“¡Abba! Ñuca Yayito, Quiquinpajca tucui imapish jahuallami. Cai ubyanataca, Ñucamanta anchuchipai. Ñuca shina nijpipish, ama Ñuca munashca shinaca rurapaichu, Can munashca shina rurapailla”» nircami.
Chai qʼuipa tigramushpaca, dormicujta japishpami, Pedrotaca cashna nirca: «Simón, ¿dormicunguillachu? ¿Manachu ashallatapish rijcharishca cai tucungui? Mana alli yuyaicuna ama japichun chaparaichij, mañaraichij. Cancunapaj espirituca mañanata yuyacunmari, ashtahuanpish aichapica shaicushcamari canguichij» nircami.
Cutin mañanaman rishpaca, ñaupaman nishca shinallatajmi mañarca. Chaimanta tigramushpaca, cutinllatajmi dormicujta japirca. Dorminaihuan ñahuicunapish huichcaricujpimi, imata mana ni tucurcacuna. Caihuanca, ña quimsa cutin tigramushpaca, cashnami nirca: «Cancunatajca, dormicunguichij, samaricunguichijllami. Riquichij, ñamari Runa Aichayujtaca juchayujcunapaj maquipi churana pajtamushca. ¡Jatarichij! ¡Jacuchij! ¡Ñucata japichij runaca, ñami chayamucun!» nircami.
Menu
Menu
