Juan 4:43-54
Mandajpaj churitami Jesús alliyachishca
Jesusca, ishqui punlla qʼuipami, Samariamanta llujshishpa Galileaman rirca. Pai quiquinllatajmi: ‘Dios ima nishcata huillajtaca quiquin llajtallapimi, mana alli nishpa chasquincuna’ nirca. Pai nishca shinallatajmi Galileaman Jesús shamujpica, chaipi causajcunaca alli chasquircacuna. Paicunapish fiesta punllapi Jerusalenman rishpa, chai punllacunapi Jesús tucui imalla rurashcata ricushcamantami, chashna chasquircacuna.
Jesusca, sarunman yacumanta vinota rurashca Caná llajtamanmi cutin tigramurca. Chaica Galileapimi carca. Capernaumpica, jatun mandaj churashca mandajpaj shuj churimi ungushca cashca carca. Chai mandajca, Judeamanta Galileaman Jesús chayamushcata uyashpami, huañunalla ancha ungushca paipaj churita alliyachinaman richun mañangapaj Paipajman rirca.
Jesusca, chai mandajtaca:
—Ima señalcunata, jatun mancharinacunatapish rurajllapimi, cancunaca cringuichij— nirca.
Shina nijpipish chai mandajca:
—Apu, ñuca huahuaca huañungamari, jacupaiari— nircami.
Chashna nijpi, Jesús chai runata:
—Rilla, cambaj churica ña allimari— nijpica, pai rimashcata crishpa rircallami.
Pai ña huasiman chayacujpi, paipaj servijcuna tupamushpaca:
—Quiquinpaj churica ña allimari— nishpami huillarcacuna.
Chaita uyashpaca:
—¿Ima horastaj alliyarcari?— nishpa tapujpi:
—Caina chaupi punlla yallillatami, fiebreca pʼitirirca— nircacunami.
«Cambaj churica, ñamari alli» nishpa chai horas shinallatataj Jesús nishcatami, chai yayaca yuyarirca. Chaimantami paica, paipaj tucui huasi ucupuracunandij crirca.
Jesusca, Judeamanta Galileaman tigrashpami, cai cati señaltaca rurarca.
Juan 5:1-15
Betesdapimi mana cuyuri tucuj runata alliyachishca
Chai qʼuipami Jesusca Jerusalenpi, judiocunapaj fiesta tiyajpi chaiman rirca. Jerusalenpica, ovejacunata yaicuchina pungu cʼuchupimi, yacu tandarishca tiyan. Chai yacuca, hebreo rimaipica, Betesda shutimi. Chai yacu tandarishca muyundijpica, pichca corredorcunami tiyan. Chai corredorcunapica, ñahui mana ricujcuna, cojocuna, mana cuyuri tucujcunapish, shujtaj achca ungushcacunapishmi yacu cuyurijta shuyacurcacuna. Shuj angelmi yacuta cuyuchinaman huaquin huaquinllapi uriyamuj carca. Cucha yacu cuyurijpi, maijanpish punta huashicujllami, ima ungüimantapish alliyajlla carca. Quimsa chunga pusaj huatacunata ungushca shuj runapishmi chaipi carca. Pai chashna ungushca siricujta ricushpa, ña achca huatacunata chaipi shitashca cashcata yachashpami Jesusca:
—¿Alliyasha ninguichu?— nirca.
Shina nijpi ungushca runaca:
—Apu, yacu cuyurijpi ñucata huashicuchijca, pi manamari tiyanchu. Ñuca cuyuringacamaca, shujtajrajmari mishan— nircami.
Chashna nijpi Jesusca:
—Jatari, canta huandunata aparishpa rilla— nircami.
Chashna nijpica, chai runaca ña alliyarcallami. Ña alliyashcahuanmi, paita huanduna caspicunata aparishpa llujshi callarirca. Chai punllaca, sabadomi carca. Chaimantami, judiocunaca alliyaj runataca:
—Sabadomari, manamari canta huandunata aparina punllachu— nircacuna.
Shina nijpi chai runaca:
—Ñucata alliyachijmari: “Canta huandunata aparishpa rilla” nirca— nishpami huillarca.
Chashna nijpi:
—“Canta huandunata aparishpa rilla” nijca, ¿pitagari?— nishpami tapurcacuna.
Shina tapujpi ricuchisha nishpapish, chai alliyaj runaca, paita alliyachij runa chaimanta ña llujshishcamanta, pi cashcata mana yacharcachu.
Chai qʼuipami Jesusca, Diospaj huasipi tupashpaca cashna nirca:
—Riqui, cunanca ñamari alli cangui. Cutinca ama juchallinguichu, ñataj ñaupatapish yalli tucunguiman— nirca.
Chai runaca Jesús paita alliyachishcata yachashpami, judiocunaman huillagrirca.
