Hulubaton 22:17-27
Ang 30 ka Importante nga mga Hulubaton
Ang mga masunod amo ang dugang pa nga ginasiling sang maalamon nga mga tawo. Pamatii ini sing maayo samtang ginatudlo ko ini sa imo, kay magmalipayon ka gid kon mahibaluan mo kag masaulo ini. Ginatudlo ko ini subong sa imo agod magsalig ka sa Ginoo.
Nagsulat ako sang 30 ka hulubaton nga makalaygay kag makahatag sa imo sang kaalam. Paagi sini mahibaluan mo kon ano ang kamatuoran, kag makahatag ka sing masaligan nga sabat sa tawo nga magpamangkot sa imo.22:21 magpamangkot sa imo: sa literal, nagpadala sa imo.
‒1‒
Indi ka magpamintaha sa mga imol, kag indi sila pagdaog-dauga sa korte, kay ang Ginoo amo ang magadepensa sa ila. Kag kon ano ang inyo himuon sa ila nga indi maayo amo man ang himuon sang Ginoo sa inyo.
‒2‒
Indi ka magpakig-abyan sa tawo nga dali maakig, kay basi kon magpareho ka man sa iya, kag masiod ka sa sina nga batasan.
‒3‒
Indi ka magpromisa nga ikaw ang magbayad sang utang sang iban. Kay kon indi ka makabayad, kuhaon nila bisan ang imo hiligdaan.
Menu
Menu
