መዝሙር 107 NASV - Mattiyu 107 HCB

New Amharic Standard Version

መዝሙር 107:1-43

አምስተኛ መጽሐፍ

ከመዝሙር 107–150

መዝሙር 107

ከመከራ ሁሉ የሚታደግ አምላክ

1ቸር ነውና እግዚአብሔርን አመስግኑ፤

ምሕረቱም ለዘላለም ነውና።

2እግዚአብሔር የተቤዣቸው፣

ከጠላት እጅ የታደጋቸው ይህን ይበሉ፤

3ከምሥራቅና ከምዕራብ፣ ከሰሜንና ከደቡብ፣107፥3 ዕብራይስጡ ሰሜንና ባሕሩ ይለዋል።

ከየአገሩ የሰበሰባቸው እንዲህ ይናገሩ።

4አንዳንዶቹ ጭው ባለ በረሓ ተቅበዘበዙ፤

ወደሚኖሩባት ከተማ የሚያደርስ መንገድ አጡ።

5ተራቡ፤ ተጠሙ፤

ነፍሳቸውም በውስጣቸው ዛለች።

6በተጨነቁ ጊዜ ወደ እግዚአብሔር ጮኹ፤

እርሱም ከመከራቸው አዳናቸው።

7ወደሚኖሩባትም ከተማ፣

በቀና መንገድ መራቸው።

8እግዚአብሔርን ስለ ምሕረቱ፣

ለሰው ልጆችም ስላደረገው ድንቅ ሥራ ያመስግኑት፤

9እርሱ የተጠማችውን ነፍስ አርክቶአልና፤

የተራበችውንም ነፍስ በበጎ ነገር አጥግቦአል።

10አንዳንዶቹ በብረት ሰንሰለት ታስረው የተጨነቁ፣

በጨለማ፣ በጥልማሞት ውስጥ የተቀመጡ ነበሩ፤

11በእግዚአብሔር ቃል ላይ በማመፅ፣

የልዑልን ምክር አቃለዋልና።

12ስለዚህ በጒልበት ሥራ ልባቸውን አዛለ፤

ተዝለፈለፉ፤ የሚደግፋቸውም አልነበረም።

13በተጨነቁ ጊዜ ወደ እግዚአብሔር ጮኹ፤

እርሱም ከመከራቸው አዳናቸው።

14ከጨለማና ከጥልማሞት አወጣቸው፤

እስራታቸውንም በጠሰላቸው።

15እግዚአብሔርን ስለ ምሕረቱ፣

ለሰው ልጆችም ስላደረገው ድንቅ ሥራ ያመስግኑት፤

16እርሱ የናሱን በሮች ሰብሮአልና፤

የብረቱንም መወርወሪያ ቈርጦአል።

17አንዳንዶቹ ከዐመፃቸው የተነሣ ቂሎች ሆኑ፤

ከበደላቸው የተነሣ ችግር ውስጥ ገቡ።

18ሰውነታቸው የምግብ ዐይነት ሁሉ ተጸየፈች፤

ወደ ሞትም ደጆች ቀረቡ።

19በተጨነቁ ጊዜ ወደ እግዚአብሔር ጮኹ፤

እርሱም ከመከራቸው አዳናቸው።

20ቃሉን ልኮ ፈወሳቸው፤

ከመቃብርም አፋፍ መለሳቸው።

21እግዚአብሔርን ስለ ምሕረቱ፣

ለሰው ልጆችም ስላደረገው ድንቅ ሥራ ያመስግኑት፤

22የምስጋናም መሥዋዕት ያቅርቡለት፤

ሥራውንም ደስ በሚል ዝማሬ ይግለጹ።

23አንዳንዶቹ በመርከብ ወደ ባሕር ወረዱ፤

በታላቅም ውሃ ላይ ሥራቸውን አከናወኑ፤

24የእግዚአብሔርን ሥራ በዚያ አዩ፤

ድንቅ አድራጎቱንም በጥልቁ ውስጥ ተመለከቱ።

25እርሱ ተናግሮ ዐውሎ ነፋስን አስነሣ፤

ነፋሱም ማዕበሉን ከፍ ከፍ አደረገ።

26ወደ ሰማይ ወጡ፤ ወደ ጥልቅም ወረዱ፤

ከመከራቸውም የተነሣ ሐሞታቸው ፈሰሰ።

27እንደ ሰከረ ሰው ዞሮባቸው ወዲያ ወዲህ ተንገዳገዱ፤

መላው ጠፍቶባቸው የሚያደርጉትን አጡ።

28በተጨነቁ ጊዜ ወደ እግዚአብሔር ጮኹ፤

እርሱም ከመከራቸው አዳናቸው።

29ዐውሎ ነፋሱን ጸጥ አደረገ፤

የባሕሩም ሞገድ ረጭ አለ።

30ጸጥ በማለቱም ደስ አላቸው፤

ወዳሰቡትም ወደብ አደረሳቸው።

31እግዚአብሔርን ስለ ምሕረቱ፣

ለሰው ልጆችም ስላደረገው ድንቅ ሥራ ያመስግኑት፤

32በሕዝብ ጉባኤ መካከል ከፍ ከፍ ያድርጉት፤

በሽማግሌዎችም ሸንጎ ይወድሱት።

33ወንዞችን ወደ ምድረ በዳ፣

የውሃ ምንጮችንም ወደ ደረቅ ምድር ለወጠ።

34ከነዋሪዎቿ ክፋት የተነሣ፣

ፍሬያማዋን ምድር በጨው የተበከለች አደረጋት።

35ምድረ በዳውን ወደ ውሃ መከማቻ፣

ደረቁንም ምድር ወደ ውሃ ምንጭ ቀየረ።

36የተራቡትን በዚያ አስቀመጠ፤

የሚኖሩባትንም ከተማ ሠሩ።

37በዕርሻውም ዘሩበት፤ ወይንም ተከሉ፤

ብዙ ፍሬም አመረቱ።

38ይባርካቸዋል፤ እነርሱም እጅግ ይበዛሉ፤

የከብቶቻቸውም ብዛት እንዲያንስ አያደርግም።

39በጭንቅ፣ በመከራና በሐዘን፣

ቍጥራቸው አንሶ፣ ተዋርደው ነበር፤

40በመኳንንቱም ላይ መናቅን አዘነበባቸው፤

መውጫ መግቢያው በማይታወቅ በረሓ ውስጥም አንከራተታቸው።

41ችግረኞችን ግን ከጭንቀታቸው መዝዞ አወጣቸው፤

ቤተ ሰባቸውንም እንደ በግ መንጋ አበዛ።

42ልበ ቅኖች ይህን አይተው ሐሤት ያደርጋሉ፤

ጥመትም ሁሉ አፏን ትዘጋለች።

43እንግዲህ ማንም ብልህ ቢሆን፣ ይህን ነገር ልብ ይበል፤

እርሱም የእግዚአብሔርን ምሕረት ያስተውላል።

Hausa Contemporary Bible

Este capítulo no está disponible momentáneamente. Por favor intente nuevamente luego.