Kurdi Sorani Standard

پەندەکانی سلێمان 20

1شەراب گاڵتەجاڕە و مەستی غەڵبەغەڵب دەکات،
    ئەوەی پێی وێڵ بێت دانا نییە.

هەڵچوونی پاشا وەک نەڕەی شێرە،
    ئەوەی تووڕەیی بکات لە دژی گیانی خۆی تاوان دەکات.

وازهێنان لە ناکۆکی ڕێزدارییە بۆ پیاو،
    بەڵام هەموو گێلێک هەڵیدەگیرسێنێت.

لە زستاندا تەمبەڵ زەوی ناکێڵێت،
    بۆیە لە دروێنەدا سواڵ دەکات و دەستی ناکەوێت.

پلان لە دڵی مرۆڤدا ئاوێکی قووڵە،
    بەڵام تێگەیشتوو دەریدەهێنێت.

زۆر کەس بانگەشەی خۆشەویستی نەگۆڕ دەکەن،
    بەڵام کەسی جێگای متمانە کێ دەیدۆزێتەوە؟

کەسی ڕاستودروست بە ڕێگای تەواوی خۆیدا دەڕوات،
    دوای خۆی خۆزگە بە منداڵەکانی دەخوازرێت.

پاشای دانیشتوو لەسەر تەختی دادوەری،
    بە چاوەکانی هەموو خراپەیەک شەن دەکات.

کێیە دەڵێت: «دڵی خۆمم بێگەرد ڕاگرت،
    پاک بوومەوە لە گوناهم»؟

10 دوو کێش و دوو پێوانەی لاسەنگ[a]،
    هەردووکیان قێزەونن لەلای یەزدان.

11 تەنانەت منداڵیش بە کردارەکانی دەناسرێت،
    ئاخۆ کردەوەکەی پاک و ڕاستە.

12 گوێ کە دەبیستێت و چاو کە دەبینێت،
    یەزدان دروستکەری هەردووکیانە.

13 حەز لە خەو مەکە نەوەک هەژار بیت،
    چاوت کراوە بێت و تێر نان بە.

14 کڕیار دەڵێت: «خراپە، خراپە!»
    بەڵام کە ڕۆیشت شانازی پێوە دەکات.

15 زێڕ هەیە و یاقووت[b] زۆرە،
    بەڵام لێوی زانیاری گەوهەرێکی بەهادارە.

16 ئەگەر کەسێک بووە کەفیلی نامۆیەک کەواکەی لێ وەربگرە،
    لەبەر بێگانەکە بارمتەی لێ وەربگرە.

17 بەتامە بۆ مرۆڤ نانی بە فێڵ،
    بەڵام دواتر دەمی پڕ دەبێت لە چەو.

18 پلانەکان بە ئامۆژگاری دێنە دی،
    بە ڕاوێژ بجەنگە.

19 دەمشڕ نهێنی ئاشکرا دەکات،
    بۆیە تێکەڵی چەنەباز مەبە.

20 ئەوەی نەفرەت لە دایک و باوکی بکات،
    لەناو جەرگەی تاریکیدا چرای دەکوژرێتەوە.

21 میراتێک لە سەرەتای ژیان و بە زوویی دەست بکەوێت
    کۆتاییەکەی بێ بەرەکەت دەبێت.

22 مەڵێ: «خراپە بە خراپە دەدەمەوە.»
    چاوەڕێی یەزدان بکە ڕزگارت دەکات.

23 یەزدان قێزی لە بەکارهێنانی دوو کێشی جیاواز دەبێتەوە،
    تەرازووی لاسەنگ باش نییە.

24 هەنگاوەکانی مرۆڤ لە یەزدانەوەیە،
    ئیتر مرۆڤ چۆن لە ڕێگای خۆی تێدەگات؟

25 تەڵەیە بۆ مرۆڤ بە سەرەڕۆیی نەزرێک تەرخان بکات،
    ئینجا پاش نەزرەکە پرسوڕا بکات.

26 پاشای دانا بەدکاران شەن دەکات،
    بە جەنجەڕ بەسەریاندا دێت.

27 چرای یەزدان ڕۆحی مرۆڤ دەپشکنێت،
    هەروەها هەموو ناخی دەروونیش.

28 خۆشەویستی نەگۆڕ و دڵسۆزی پاشا دەپارێزن،
    بە خۆشەویستی نەگۆڕ تەختی دەچەسپێت.

29 شانازی لاوان هێزیانە،
    ڕیش سپیێتیش شکۆمەندی پیرانە.

30 برینی لێدان خراپە پاک دەکاتەوە،
    لێدانی قامچیش ناخی دەروون.

Notas al pie

  1. 20‏:10 بەکارهێنانی دوو کێشی جیاواز، یەکێک بۆ کڕین و یەکێک بۆ فرۆشتن.‏
  2. 20‏:15 یاقووت: گەوهەری سووری تۆخ.‏

Habrit Hakhadasha/Haderekh

Este capítulo no está disponible momentáneamente. Por favor intente nuevamente luego.