Kurdi Sorani Standard

ئیشایا 62

سییۆن ناوێکی نوێی هەیە

1لە پێناوی سییۆن بێدەنگ نابم و
    لە پێناوی ئۆرشەلیم هێمن نابم
هەتا بێتاوانییەکەی وەک گزنگی خۆر دەدرەوشێتەوە و
    ڕزگاریشی وەک مەشخەڵ داگیرسێت.
ئەو کاتە هەموو نەتەوەکان بێتاوانییەکەت و
    هەموو پاشاکان شکۆمەندییەکەت دەبینن.
ناوێکی نوێت لێ دەنرێت
    کە دەمی یەزدان دیاری دەکات.
دەبیت بە تاجی جوانی لە دەست یەزدان و
    تاجەگوڵینە لەناو لەپی خودات.
چیتر ناوت نانرێت «بەجێماو» و
    چیتر بە خاکەکەت ناگوترێت «وێرانە»،
بەڵکو پێت دەگوترێت «حەفچیڤا[a]»،
    خاکەکەشت، «بەعولە[b]»،
چونکە یەزدان بە تۆ دڵخۆش دەبێت،
    خاکەکەشت مێردی دەبێت.
چونکە چۆن گەنج دەبێت بە مێردی کچێکی پاکیزە،
    ئاواش کوڕەکانت دەبن بە مێردت.
وەک دڵخۆشی زاوا بە بووک،
    ئاواش خودات بە تۆ دڵخۆش دەبێت.

ئەی ئۆرشەلیم، ئێشکگرم لەسەر شووراکانت داناوە،
    بەردەوام شەو و ڕۆژ بێدەنگ نابن.
ئەی ئەوانەی یەزدانتان لە یادە،
    ئۆقرە مەگرن،
لێ مەگەڕێن یەزدان ئۆقرە بگرێت هەتا ئۆرشەلیم دەچەسپێنێت و
    ناوداری دەکات لە زەویدا.

یەزدان بە دەستی ڕاستی خۆی و
    بە هێزی بازووی سوێندی خوارد:
«چیتر دانەوێڵەکەت
    ناکەم بە خۆراک بۆ دوژمنەکانت و
شەرابە نوێیەکەشت کە پێوەی ماندوو بوویت،
    نامۆکان نایخۆنەوە،
بەڵکو ئەوانە دەیخۆن کە گەنمیان بەرهەم هێناوە و
    ستایشی یەزدان دەکەن،
ئەوانەی ترێیان ڕنیوەتەوە
    لە حەوشەی پیرۆزگاکەم دەیخۆنەوە.»

10 تێپەڕ بن! تێپەڕ بن لە دەروازەکانەوە!
    ڕێگای گەل خۆش بکەن.
ئامادەی بکەن! ڕێڕەو ئامادە بکەن!
    لە بەرد پاکی بکەنەوە.
ئاڵا بۆ گەل بەرز بکەنەوە.

11 ئەوەتا یەزدان
    بە هەر چوار لای زەویدا ڕایگەیاندووە:
«بە شاری سییۆن بڵێن،
    ”وا ڕزگارکەرەکەت دێت!
وا پاداشتەکەی لەگەڵیەتی و
    خەڵاتەکەی لەبەردەمییەتی.“»
12 ناویان لێ دەنێن، «گەلە پیرۆزەکە»،
    «ئەوانەی یەزدان کڕیونیەتیەوە»،
تۆش ناوت لێ دەنرێت، «داواکراوەکە»،
    «شارە بەجێنەماوەکە».

Notas al pie

  1. 62‏:4 واتە (شادیم لە ئەودایە).‏
  2. 62‏:4 واتە بە مێرد.‏

Slovo na cestu

Este capítulo no está disponible momentáneamente. Por favor intente nuevamente luego.